Rehabilitering av Mek-bygget
Det er i ferd med å skje saker i det gamle Mek-bygget ved Herøy vidaregåande skule der elevane ved Teknikk- og industriell produksjon (TIP) og Bygg- og anleggsteknikk (BAT) held til.
Skulen har endeleg fått tildelt midlar til rehabilitering av bygget, som er kostnadsrekna til 15 millionar kroner. Skulen har lenge ønskt å rehabilitere bygget, men har ikkje hatt høve til å gjere dette tidlegare fordi bygget har vore fullt av asbest, eit helseskadeleg og farleg stoff. På taket held Kristiseter på å bygge eit nytt ventilasjonsanlegg, noko som bygget ikkje har hatt før.
Elevane får i neste skuleår eit tryggare areal å arbeide på, med tre nye verkstader i første etasje. I andre etasje byggjer ein klasserom, arbeidsrom, arbeidsplassar til lærarane, rom for elevbedrifter, nye garderobar og meir. Skulen har søkt fylket om midlar til nye maskiner for å byte ut dei eldste elementa i maskinparken, og denne søknaden ventar ein svar på.
I tillegg til endringane inne i bygget, skal det setjast opp ein bygningshall på 20 x 10 meter som byggfagelevane skal bruke.
Elevar og tilsette ved Herøy vgs håper at bygget blir ferdig til skulestart i august 2007, men Kristiseter trur ikkje at dei klarer det før til haustferien, noko som då skulle bli oktober 2007.
Av Lene Kvalsvik, Camilla Fylling og Ingeborg Bigset
