Miljøambassadør på besøk
Herøy vidaregåande skule arrangerer eigne fagdagar i løpet av skuleåret. I veke 41 var det fagdag i naturfag for Vg1-elevane og Vg3 påbygging. Same veka var det også fagdag i samfunnsfag for dei som går Vg2.
I samband med fagdagen i naturfag fekk skulen besøk av miljøambassadør og student ved Norges Handelshøgskule i Bergen, Harald Martens Holm. Poenget med besøket og foredraget hans, «Generasjon Grønn», er å formidle miljøendringane som skjer på jorda vår og dei utfordringane dette gir oss. Eit foredrag om klimaendringane og korleis klimaendringane påverkar dyreartane og deira leveområde. Miljøambassadøren snakka også om korleis dagens ungdom i Noreg, som er framtidas arbeidsstyrke, kan bidra.
- Det er dagens skuleelevar som har moglegheita til å bli den generasjonen som verkeleg kan setje sitt preg på framtida og forme det grøne samfunnet, sa foredragshaldaren.
Det er miljøverndepartementet som har engasjert seks unge miljøambassadørar til å reise rundt til skular i heile landet med miljøforedraget «Generasjon Grønn». Foredraget har eit tverrfagleg innhald og formidler både naturvitskaplege og samfunnsfaglege problemstillingar tilpassa kompetansemåla som ein finn i Kunnskapsløftet.
